| Inhalt |
Swenne daz wîp der bluomen nith enhât, daz chumt von grôzzen trovren von laide von sivften van vorchte van zorn van vngevuoger vaste van langem wachen van dem woesem sichtvom des bluotes vu der div nase ze harte rinnet vu van dem fiber. Daz ovch der bluome gebristet ê zît daz div wîp ir rechtes nine habent, daz chumt van dem geswer, daz an dem muterlîn, dâ daz chint inne wirt, erswirt, wan die andern (!) sich verstôzzent vu werdent sô enge, daz ez vvzflvz nith gehaben mach, wand div vivchte wirt diche als ein lîm. vu chumt ouch van einem dinge, daz di wiep gern sitzent ovf di chalten erde, sô erchaltet in der nider lîp, wand er vil vlêsches hât vnd lutzil gewains vu enmach der chelten nith wider stên. Swenne div fivchte danne vvz wil als si sich gesammet vvz allem lîbe vntzen vvor den nabel mit gemache der wirme, als ez fvorbaz wil, sâ gestêt ez als ein vnslit, daz man ovf chelte givzet, alsô westêt ez in ir vu erstochet, daz ier sô wê gesicht daz si waent elliv zebresten. ê ir danne div gnâd geschiht, daz si van der vivol werd erlôst, sô erwefelt ir di .f. daz si sichs mvolîch erholn mach, wand swer ein bôse sivre in ein schôn vaz givzzet, ez smechet immer dar nâch. dâ van wirt manch wîp den mannen vnmêre div ê gut ze minnen was. als daz wîp des selben sichtvoms nine haben mach, sô tvot ir daz habut (!) wê, der hals, der rukke, ougen, alle der lîp swâret ir vu lustet si bôses ezzens vu sovres. daz gůt smechet ir vbel, ier harn ist swarz vnd sanich, oder als ein wazzer dâ ein fleisch mit gewaschin ist. hilfet man wîben nith enzit, di werdent wazzersutig (!) vnd pidempt. |